O‘zbekiston Davlat raqobat qo‘mitasi “Navoiy kon-metallurgiya kombinati” (NKMK) tomonidan Buyuk Britaniyaning Villamy LP kompaniyasi tender savdolaridan asossiz ravishda chetlatilgani yuzasidan ish qo‘zg‘atdi. Bu haqda qo‘mita matbuot xizmati xabar bermoqda.
Ma’lum bo‘lishicha, NKMK porshenli nasos agregatlarini yetkazib berish bo‘yicha tender tashkil etgan. Tender savdolari ishtirokchilari takliflari NKMK xodimlaridan tuzilgan baholovchi guruh tomonidan ko‘rib chiqilgan.
Baholovchi guruh Villamy LP bergan taklifni muhim ahamiyatga ega bo‘lmagan farqlanishlar asosida tender hujjatlari talablariga mos kelmasligi haqida xulosa bergan va tender savdolari keyingi bosqichiga o‘tkazilmagan.
Ayni vaqtda, shu baholovchi guruh tenderning boshqa ishtirokchisi taklifini ham ko‘rib chiqqan bo‘lib (ishtirokchining nomi qo‘mita axborotida ko‘rsatilmagan), uning hujjatlari va tender hujjatlari shartlari orasidagi farqlar Villamy LP’ning taklifidagi farqlanishlarga nisbatan muhimroq ekanligiga qaramasdan, uning hujjatlari keyingi bosqichga o‘tkazilgan.
“Qo‘mita tomonidan o‘tkazilgan o‘rganishlar natijasida, NKMK tomonidan raqobat to‘g‘risidagi qonunchilik talablarini buzilgan degan xulosaga kelindi. Natijada, NKMK tomonidan yuqoridagi tender savdolari bekor qilindi va qaytadan tender o‘tkazish haqida e’lon berildi”, — deyiladi qo‘mita axborotida.
Qayd etishlaricha, NKMKning ushbu holatga yo‘l qo‘ygan mas’ul xodimlari o‘rnatilgan tartibda ma’muriy javobgarlikka tortilgan. Aynan qanday choralar ko‘rilganiga qo‘mita axborotida aniqlik kiritilmagan.
Izoh (0)