Франциянинг Ўзбекистондаги элчихонаси Ўзбекистон Республикаси Халқ таълими вазирлиги, Олий ва ўрта махсус таълим вазирлиги ҳамда Ўзбекистон ёшлар театри билан ҳамкорликда 2016 йил 15—16 апрель кунлари мактаб, коллеж ва лицей ўқувчилари ҳамда талабалар учун мўлжалланган франкофон театр фестивалини ташкил этади. Бу ҳақда элчихона матбуот хизмати хабар бермоқда.
Фестивалда иштирок этувчи артистлар ёши 12 дан 22 ёшгача бўлиши, ҳар бир труппа кўпи билан 7 артистдан иборат бўлиши лозим. Фестивалда кўпи билан 20 та труппа иштирок этиши мумкин.
Труппалар учта туркумга бўлинган ҳолда ўз асарларини намойиш этади: 12—15 ёшлар, 15—18 ёшлар ва 18—22 ёшлар. Ҳар бир спектакл 10 дақиқадан 20 дақиқагача давом этади. Фестиваль Тошкент театрларидан бирида бўлиб ўтади.
Элчихона фестиваль иштирокчиларини 15—16 апрель кунлари тушлик билан таъминлайди.
Фестиваль якунлари бўйича француз ва ўзбек мутахассисларидан иборат ҳакамлар ҳайъати томонидан 10 та мукофот тақдим этилади.
Аризалар 12 февралгача қабул қилинади.
Фестивалнинг қўшимча шартлари ва унга ёзилиш варақасини юклаб олиш учун ушбу ҳаволага ўтинг.
Изоҳ (0)