Ўзбекистон Республикаси Президентининг 2008 йил 31 октябрдаги «Аҳолининг омонатларини жалб қилиш бўйича республика тижорат банклари ўртасида танлов ўтказиш тўғрисида»ги қарорига мувофиқ, республика тижорат банклари ўртасида 2015 йил якунларига кўра аҳоли бўш пул маблағларини банклардаги омонатларга жалб қилиш бўйича танлов ўтказилди.
Танлов ғолибларини тақдирлаш маросими Ташкилий қўмита раиси — Ўзбекистон Республикаси Марказий банки раиси Ф.Муллажонов бошчилигида Ўзбекистон Банклари ассоциациясида бўлиб ўтди.
Мазкур танловда «Микрокредитбанк» акциядорлик-тижорат банки ҳам фаол иштирок этиб, учта асосий ва битта қўшимча номинацияда, жумладан, «Пластик карточкалар асосида иш ҳақи лойиҳаларини амалиётга жорий этиш бўйича энг яхши банк филиали» номинациясида банкнинг Косонсой филиали — биринчи ўрин, «Қишлоқ жойларда аҳоли омонатларини жалб қилиш бўйича йилнинг энг яхши филиали» номинациясида банкнинг Оқтош филиали — учинчи ўрин, «Қишлоқ жойларда аҳоли омонатларини жалб қилиш бўйича йилнинг энг яхши мини-банки» номинациясида банкнинг Пскент филиали «Муротали» мини-банки — биринчи ўрин ҳамда «Миллий валютадаги энг яхши жамғарма депозити» номинациясида банкнинг «Нуроний» жамғарма омонати ғолиб деб топилди.
Таъкидлаш жоизки, мазкур тадбир юртимиз молия муассасаларини янада ривожлантириш, аҳолининг бўш пул маблағларини депозитларга жалб этишда банклар учун кучли рағбатлантирувчи омил бўлиб хизмат қилмоқда. Жумладан, бугунги кунда «Микрокредитбанк» АТБ тизимда аҳоли учун қулай бўлган «Пойдевор», «Адолат», «Самара», «Жозиба», «Омад», «Фаровон ҳаёт», «Ёшлик» ва «Оила жамғармаси» деб номланган жами 19 турдаги жозибадор омонатлар жорий этилган бўлиб, шундан 16 турдаги миллий валютада ва 3 та чет эл валютасидаги омонатлар қабул қилинмоқда.
Бу борада рақамларга мурожаат қилсак, 2016 йил 1 январь ҳолатига кўра жалб этилган аҳоли омонатлари қолдиқи 212,3 миллиард сўмни, омонатчилар сони эса 524 368 нафарни ташкил қилди. Бу эса ўтган йилнинг шу даврига нисбатан 71,1 миллиард сўмга ёки 150,0 фоизга, омонатчилар сони эса 248 398 нафарга ошганини кўрсатади. Шунингдек, банк томонидан ҳисобот даврида муомалага чиқарилган пластик карточкалар сони 959 395 тани ташкил қилиб, ўтган йил бошига нисбатан 40 фоизга ёки 274 272 донага кўпайди. Шундан ойлик «Иш ҳақи лойиҳа»ларига йўналтирилган пластик карталар сони 815 486 тага етказилди. Мижозларга ўрнатилган тўлов терминаллари сони 12 810 тани, пластик карточкалардаги маблағлар қолдиғи эса 112,9 миллиард сўмни ташкил этди.
Реклама ҳуқуқи асосида. Хизматлар лицензияланган
Изоҳ (0)