«Ўзтемирйўлйўловчи» компанияси 2015 йил 31 декабрдан поезд чипталари нархидан қўшимча хизматлар, жумладан, озиқ-овқат учун тўловни чиқариб ташлади, деб ёзади «Газета.uz». Бу Ўзбекистон Республикаси Хусусийлаштириш, монополиядан чиқариш ва рақобатни ривожлантириш давлат қўмитаси талаби билан амалга оширилди.
«Ўзтемирйўлйўловчи» АЖ томонидан истеъмолчилар ҳуқуқларининг чекланиши ҳақидаги иш фуқаролар аризалари асосида қўзғатилган. Текширув чоғида аниқланишича, «Ўзтемирйўлйўловчи» «Шарқ» ва «Насаф» поездларида 5335 сўм миқдорида озиқ-овқат учун тўлов белгилаган ва уни йўл чиптаси нархига қўшган.
«Ўзтемирйўлйўловчи» хатти-ҳаракатларида «Истеъмолчилар ҳуқуқлари ҳимояси тўғрисида»ги қонуннинг 2-қисми 21-моддаси бузилиши белгилари аниқланди, унга кўра, сотувчи (хизмат кўрсатувчи) истеъмолчини қўшимча маҳсулот ёки хизматлар учун пул тўлашга мажбурлашга ҳақли эмас.
Вазиятни ўрганиб, Хусусийлаштириш, монополиядан чиқариш ва рақобатни ривожлантириш давлат қўмитаси «Ўзтемирйўлйўловчи»га қонунбузарликни бартараф этиш ва бундай қонунбузарликларга келажакда бошқа йўл қўймаслик ҳақидаги фармойишни йўналтирди.
Изоҳ (0)