«ЮКОС»нинг собиқ раҳбари Михаил Ходорковскийга нисбатан очилган янги жиноий иш бўйича тергов муддати 30 июлгача узайтирилди. Бу ҳақда терговга яқин манбага таяниб, «ТАСС» маълум қилди, деб хабар беради Meduza.
«ЮКОС» нефть компанияси раҳбарияти аъзоларига нисбатан жиноий иш 1998 йилда очилган. Иш доирасида «ЮКОС» раҳбарияти 1998 йилда Нефтeюганск мэри Владимир Петуховни ўлдирганликда ва 1999 йилда «Ист Петролеум Хандельсгез» компанияси бошқарувчиси Евгений Рибиннинг ҳаётига суиқасд қилишга уринишда гумон қилинди.
2007 йилда «ЮКОС»нинг ички иқтисодий хавфсизлик хизмати раҳбари Алексей Пичугин бу жиноятларда айбдор деб топилди ва умрбод қамоқ жазосига ҳукм қилинди.
2015 йил июнь ойида РФ Тергов қўмитаси бу иш бўйича терговни қайта тиклади. Декабрь ойида «ЮКОС»нинг собиқ раҳбари Михаил Ходорковскийга нисбатан сиртдан айблов қўйилди. Кейинроқ у сиртдан ҳибсга олинди ва халқаро қидирувга берилди.
Михаил Ходорковский молиявий фирибгарликлар ва солиқ тўлашдан қочишда айбдланиб, ўн йилга яқин ҳибсда сақланди ва 2013 йилнинг охирида колониядан озод қилинди. Ходорковский озодликка чиқиши билан Россияни тарк этди.
Изоҳ (0)