Туркияда Эрдўғонни «диктатор» деб атаган мухолифат партия раисига нисбатан жиноий иш очилди
Туркия бош прокуратураси мухолифатдаги Халқ-республикачилар партияси раиси Камол Қиличдорўғлига нисбатан президент Ражаб Тоййиб Эрдўғонни ҳақорат қилгани сабабли жиноий иш очди. Бу ҳақда «Корреспондент. нет» хабар бермоқда.
Эрдўғоннинг адвокатлари прокуратурага ўз ҳимоялари остидаги шахснинг шаънига ҳақорат бўлгани ҳақида даъво киритган ва партия етакчисидан 30 минг евро товон ундиришни талаб қилган. Уларнинг прокуратурага мурожаат этишига Қиличдорўғлининг партия конгрессидаги нутқи сабаб бўлган. Сиёсатчи мамлакат жануби-шарқида ўтказилаётган курдларга қарши ҳарбий амалиётни тўхтатишни талаб қилган 27 нафар турк олими «диктатор деб ҳам аташадиган кишининг кўрсатмаси» билан қамалганини қоралаганди.
Эслатиб ўтамиз, олдинроқ Туркиянинг Текирдоғ вилоятида яшовчи 17 ёшли ўсмир Эрдўғонни Facebook орқали ҳақорат қилгани учун ҳибсга олингани ҳақида хабар берилганди.
