АҚШда оқ танли полициячи отиб ўлдирган қора танли эркакнинг оиласи 4,8 млн доллар товон пули олади
АҚШда оқ танли полициячи томонидан отиб ўлдирилган қора танли эркакнинг қариндошлари 4,8 миллион доллар товон пули олади. Бу ҳақда маҳаллий ОАВларга таяниб, «ТАСС» хабар бермоқда.
2015 йилнинг 19 июлида Цинциннати Университети кампусини қўриқлаётган 25 ёшли Рэй Тенсинг 43 ёшли Семюэль Дюбоузнинг автомобилини тўхтатди. Тергов давомида Тенсингнинг маълум қилишича, автомобилининг олдида рақами бўлмаган Дюбоуз ҳужжатларини кўрсатишдан бош тортиб, ўзини тажовузкорона тутган. Шундан сўнг полициячи бир марта ўқ узган. Қора танли эркакнинг бошига ўқ тегиши натижасида у ҳалок бўлган.
Полициячи ушбу ҳодисадан сўнг ҳуқуқни муҳофаза қилиш органларидан бўшатилди ва судга берилди. Агар у айбдор деб топилса, умрбод қамоқ жазосига ҳукм қилиниши мумкин.
Тенсингни ёллаган ўқув муассасаси марҳумнинг қариндошларига улар талаб қилган 4,8 миллион долларни тўлайди ва Дюбоузнинг етим қолган 12 боласини шу университетда бепул ўқишига имконият яратиб беради.
