Тошкент шаҳридаги автобуслар ҳаракатини смартфондан кузатиш имконини берувчи «VIA.uz» мобил дастурини ишлаб чиққан VIA-TASHKENT компанияси раҳбари Мурод Обидов лойиҳанинг тўхтатилиши ҳақидаги хабарларга изоҳ берди. Бу ҳақда UZ24 хабар бермоқда.
«Сўнгги бир неча йил мобайнида биз масофадан назорат қилинадиган диспетчерлик бошқаруви тизимини ўрганиш, лойиҳалаштириш ва татбиқ этиш устида ишладик. Татбиқ этиб бўлинган ушбу тизим бирдан «Тошшаҳартрансхизмат» раҳбариятига керакмас бўлиб қолди. Улар дастурчиларни ва умуман дастурни алмаштиришга қарор қилди. Бу асосий сабаб», — деди Обидов.
Мурод Обидовнинг қайд этишича, VIA-TASHKENT’нинг «Тоштрансдиспетчерхизмат» корхонаси билан шартномаси 31 декабрь куни якунига етган, бироқ компания 14 январга қадар дастурни ўз маблағлари ҳисобидан қўллаб-қувватлаб туради.
«‘Тошшаҳартрансхизмат’ янги дастурчилар олдига картография лицензиясига эга бўлиш талабини ҳам қўйган, биз бу ҳақда 29 декабрь куни хабар топдик. Бундай лицензия Вазирлар Маҳкамаси ҳузуридаги комиссия томонидан берилади ва бундай қисқа вақт ичида уни олиш имкони йўқ», — деди VIA-TASHKENT раҳбари.
Мурод Обидовнинг қайд этишича, мобил дастур фаолиятини қайта тиклаш масаласи VIA-TASHKENT’га боғлиқ эмас. Ҳозирги вақтда компания алоҳида йўналишли таксиларнинг ҳаракат йўналишлари билан боғлиқ ахборотни мобил дастурга киритиш устида ишламоқда.
Эслатиб ўтамиз, «Тоштрансдиспетчерхизмат» корхонаси ва Тошкент шаҳар ҳокимлигининг Йўловчи транспортининг барча турлари ҳаракатини лицензиялаш ва мувофиқлаштириш департаменти иштирокида ишлаб чиқилган «VIA.uz» мобил дастури 14 январдан маълумотлар узатишни тўхтатиши ҳақида аввалроқ хабар берилган эди.
Изоҳ (0)