Туркия суди 26 ёшли хакер Онур Копчакни 334 йиллик қамоқ жазосига ҳукм қилди. У шериклари билан 2013 йилдан бери кредит карталари эгаларининг шахсий маълумотларини кибержиноятчиларга сотиш билан шуғулланиб келган. Бу ҳақда Daily Sabah манбаларига таяниб, «Hi-tech.mail.ru» хабар бермоқда.
Копчак биринчи бор 2013 йилда 43 нафар кредит эгалари шахсий маълумотларини қўлга киритгани учун 199 йиллик қамоқ жазосига тортилганди. Иккинчи гал ҳам унинг айнан шундай кўринишдаги фирибгарлиги фош этилган: хакер бошқа кимсалар билан бирга турли банкларнинг сохта веб-саҳифаларини очган, жабрдийдалар эса уларга махфий паролларини киритган.
Янги ҳукм бўйича Онур Копчакка 135 йиллик қамоқ жазосига тайинланган, бу аввалги ҳукм билан қўшганда 334 йил бўлади. Жабрдийдалар қанча зарар кўргани ҳақида маълум қилинмаган.
Изоҳ (0)