Toshkent shahridagi avtobuslar harakatini smartfondan kuzatish imkonini beruvchi “VIA.uz” mobil dasturini ishlab chiqqan VIA-TASHKENT kompaniyasi rahbari Murod Obidov loyihaning to‘xtatilishi haqidagi xabarlarga izoh berdi. Bu haqda UZ24 xabar bermoqda.
“So‘nggi bir necha yil mobaynida biz masofadan nazorat qilinadigan dispetcherlik boshqaruvi tizimini o‘rganish, loyihalashtirish va tatbiq etish ustida ishladik. Tatbiq etib bo‘lingan ushbu tizim birdan “Toshshahartransxizmat” rahbariyatiga kerakmas bo‘lib qoldi. Ular dasturchilarni va umuman dasturni almashtirishga qaror qildi. Bu asosiy sabab”, — dedi Obidov.
Murod Obidovning qayd etishicha, VIA-TASHKENT’ning “Toshtransdispetcherxizmat” korxonasi bilan shartnomasi 31-dekabr kuni yakuniga yetgan, biroq kompaniya 14-yanvarga qadar dasturni o‘z mablag‘lari hisobidan qo‘llab-quvvatlab turadi.
“‘Toshshahartransxizmat’ yangi dasturchilar oldiga kartografiya litsenziyasiga ega bo‘lish talabini ham qo‘ygan, biz bu haqda 29-dekabr kuni xabar topdik. Bunday litsenziya Vazirlar Mahkamasi huzuridagi komissiya tomonidan beriladi va bunday qisqa vaqt ichida uni olish imkoni yo‘q”, — dedi VIA-TASHKENT rahbari.
Murod Obidovning qayd etishicha, mobil dastur faoliyatini qayta tiklash masalasi VIA-TASHKENT’ga bog‘liq emas. Hozirgi vaqtda kompaniya alohida yo‘nalishli taksilarning harakat yo‘nalishlari bilan bog‘liq axborotni mobil dasturga kiritish ustida ishlamoqda.
Eslatib o‘tamiz, “Toshtransdispetcherxizmat” korxonasi va Toshkent shahar hokimligining Yo‘lovchi transportining barcha turlari harakatini litsenziyalash va muvofiqlashtirish departamenti ishtirokida ishlab chiqilgan “VIA.uz” mobil dasturi 14-yanvardan ma’lumotlar uzatishni to‘xtatishi haqida avvalroq xabar berilgan edi.
Izoh (0)