«Тошшаҳартрансхизмат» шаҳар автобуслари ҳаракатини смартфонда кузатиш имконини берувчи лойиҳани тўхтатишга қарор қилди

Тошкентдаги автобуслар ҳаракатини смартфонда кузатиш имконини берувчи лойиҳа 2016 йил 14 январдан тўхтатилади. Бу ҳақда «VIA.uz» мобил дастурида ахборот берилган.

«Тошшаҳартрансхизмат» компанияси раҳбарияти қарорига мувофиқ ва «Тоштрансдиспетчерхизмат» корхонаси билан VIA-TASHKENT’нинг шартномаси тугагани сабабли, 14 январдан «VIA.uz» тизимида автобус маршрутлари бўйича маълумотлар берилиши тўхтатилади.

«Тошшаҳартрансхизмат» компанияси нима сабабдан бундай қарор қабул қилгани, VIA-TASHKENT компанияси нима учун «Тоштрансдиспетчерхизмат» корхонаси билан шартномасини узайтирмаганига аниқлик киритилмаган.

2014 йил охирида ишга туширилиб, кейин тўхтаб қолган ва 2015 йил ноябрида қайта ишга туширилган лойиҳа ёрдамида керакли автобуснинг тегишли бекатга келиш вақтини билиш, автобуслар ҳаракати жадвали билан танишиш ва ҳатто транспорт воситасининг харитадаги ҳаракатини кузатиш мумкин эди.

«VIA.uz» мобил дастурининг Android операцион тизимида ишлайдиган қурилмалар учун мўлжалланган версияси, 12 январь ҳолатига кўра, 10—50 минг марталик миқдор оралиғида юклаб олинган. Маълумот учун, 2015 йилнинг октябрь ойи ҳолатига кўра, Тошкент шаҳридаги автобуслар хизматидан 616 мингдан ортиқ йўловчи фойдаланади.

Лойиҳа «Тоштрансдиспетчерхизмат» корхонаси ва Тошкент шаҳар ҳокимлигининг Йўловчи транспортининг барча турлари ҳаракатини лицензиялаш ва мувофиқлаштириш департаменти иштирокида ишлаб чиқилгани ҳақида аввалроқ хабар берилган эди.