Путин Асад Суриядаги низолар чоғида хатоликларга йўл қўйганини тан олди
Россия президенти Владимир Путин Германиянинг Bild нашрига берган интервьюсида Сурия президенти Башар Асад мамлакатдаги низолар чоғида хатоликларга йўл қўйганини тан олди, деб ёзади «Газета.ru».
«Сурия президенти Башар Асад ўз одамларини бомбардимон қилди ва ўн минглаб қурбонлар учун масъул, бу факт. Асад — сизнинг иттифоқдошингиз? Ундай бўлса, нима учун?» — дея сўрашди журналистлар Путиндан.
«Бу қийин савол. Мен президент Асад ушбу низо чоғида кўплаб хатоларга йўл қўйганига ишонаман», — дея саволга изоҳ берди Россия президенти.
Шу билан бирга, унинг сўзларига кўра, Суриядаги низо ташқаридан қурол-яроғ, пул ва жангарилар ёрдамида қўллаб-қувватланиб турмаганида, бунчалик катталашиб кетмаган бўларди.
«Бунинг учун ким жавоб беради? Мамлакатни сақлаб қолишга уринаётган Асад ҳукуматими? Ёки уни барбод қилишга интилиб, ҳукумат билан курашаётган исёнчиларми?» — дея қўшимча қилди Путин.
