Эбола безгагининг Ғарбий Африка мамлакатларида тарқалиши тўхтади. 29 декабрь, сешанба куни Бутунжаҳон соғлиқни сақлаш ташкилоти минтақадаги давлатлар орасида ушбу касалликдан қутилган сўнгги мамлакат Гвинея бўлганлигини маълум қилди, деб хабар беради «Корреспондент.net».
Гвинеяда 42 кун ичида Эбола билан касалланишнинг биронта янги ҳолати қайд этилмади. Олдинроқ Бутунжаҳон соғлиқни сақлаш ташкилоти Либерия ва Сьерра-Леонеда ўлимга олиб келувчи ушбу вирус тарқалиши тўхтаганини маълум қилган эди.
Касаллик тарқалиши 2013 йил декабрь ойида Гвинеянинг Гекеду қишлоғида бошланганди. Ўшандан буён Эболадан Гвинеяда 2500 дан ортиқ одам ҳалок бўлиб, 3800 киши вирусни юқтириб олгани қайд этилди. Кейинчалик касаллик қўшни давлатларга тарқала бошлади.
Расмий маълумотларга кўра, 11 300 киши касаллик қурбонига айланган, 28 600 киши вирусни юқтириб олган. Бутунжаҳон соғлиқни сақлаш ташкилоти Эбола билан касалланганлар сони қайд этилган ҳолатлардан анча кўп, деб ҳисобламоқда.
Изоҳ (0)