Жаҳоннинг энг бадавлат 400 одами 2015 йилда хомашё товарларининг нархи тушиши, шунингдек, Хитойнинг иқтисодий ўсиш суръатлари пасайиши белгилари таъсирида умумий ҳисобда 19 миллиард доллар йўқотди. Бу ҳақда Bloomberg агентлиги хабар бермоқда.
Агентликнинг қайд этишича, миллиардерлар рейтингида 2012 йилдан бири биринчи марта пасайиш қайд этилди — сўнгги уч йилдан бери бадавлатлар сони ҳам, уларнинг бойлиги миқдори ҳам муттасил ўсиб бораётган эди.
«Нефтьга бўлган таклифнинг талабдан ошиб кетгани, истеъмол харажатларининг сустлиги, Хитойда бошланган иқтисодий тушкунлик — буларнинг бари инвесторларни қўрқитиб қўйди», — деди америкалик миллиардер Кен Фишер. Fisher Investments’нинг асосчиси ҳисобланган Фишер 65 миллиард доллардан ортиқ бойликка эга.
2015 йил 28 декабрь ҳолатига кўра, жаҳоннинг энг бадавлат 400 одами умумий ҳисобда 3,9 триллион долларлик маблағга эга — бу (АҚШ, Хитой ва Японияни ҳисобга олмаганда) жаҳоннинг исталган давлати ялпи ички маҳсулоти ҳажмидан кўпроқ.
Бойлар рейтингида, ўтган йилдаги каби, Microsoft асосчиси Билл Гейтс етакчилик қилмоқда. Унинг давлати 83,6 миллиард долларга баҳоланмоқда. Бироқ, қайд этиш жоиз, Гейтс сўнгги бир йил ичида 3 миллиард долларга «камбағаллашди».
Изоҳ (0)