Арктикада «Қизил китоб»га киритилган оқ айиққа портловчи пакет едирилиб, унинг ўлими видеога олинди

Арктикада ҳайвонга нисбатан шафқатсиз муомалада бўлиш билан боғлиқ ҳодиса содир бўлди. У ерда қутбчилар оқ айиқни портловчи пакет билан овқатлантирди. Натижада айиқ азобланиб ҳалок бўлди, деб хабар беради «Вести.ru».

Бу жараён видеога олиниб, интернетга жойланган. LifeNews телеканалининг маълум қилишича, айиққа портловчи моддани Врангель оролидаги қурилишда ишловчи ошпаз берган. Видеороликни телеканалга юборган муаллиф бу ҳодисани «Русальянс» компанияси ходимлари тасвирга олганлигини маълум қилган.

Компаниянинг ўзи журналистларга видео «провокация ёки қора пиар» учун чоп этилган бўлиши мумкинлигини маълум қилган. Ташкилот матбуот хизмати ҳозирги пайтда ҳақиқатан ҳам ушбу ҳодисага «Русальянс» ходимларининг алоқаси борлигини аниқлаш юзасидан текшириш ўтказилаётганлигини таъкидлади.

Шафқатсиз видео кўпчиликни, жумладан, Табиий ресурслар ва экология вазирлиги раҳбари Сергей Донскойни ҳам ғазаблантирди. У ушбу ҳолат билан шуғулланишни сўраб, Бош прокуратурага илтимоснома юборди.

Шунингдек, бу ҳодиса билан Табиатдан фойдаланиш соҳасини назорат қилиш федерал хизмати ҳам шуғулланиши лозим. «Бизда оқ айиқ ‘Қизил китоб’га киритилган, шунинг учун айиқнинг ўлдирилиши браконерлик билан тенглаштирилади», — деди Табиатни муҳофаза қилиш вазирлиги раҳбари.

Айиқни ўлдирган одам уч йилга озодликдан маҳрум этилиши мумкин.