Панама олий суди мамлакатнинг собиқ президенти Рикардо Мартинеллини ҳибсга олишга ордер берди

Панама олий суди мамлакатнинг собиқ президенти Рикардо Мартинеллини ҳибсга олишга ордер берди. Бу ҳақда «РИА Новости» хабар бермоқда.

Олдинроқ Панама прокуратураси олий судга собиқ президентни судга ҳурматсизлик билан муносабатда бўлгани учун қўлга олиш ҳақидаги сўров билан мурожаат этганди. Мамлакатни 2009—2014 йилларда бошқарган Мартинелли суд мажлисига келмагач, прокуратура айбланувчини суд ҳаракатларида иштирок этишдан бош тортаётгани ҳақида ҳукм чиқарганди.

Собиқ давлат раҳбари коррупцияга эҳтимолий алоқадорлик, мухолифат, сафдошлари ва мамлакат фуқаролари ортидан кузатувда айбланмоқда. Шунингдек, у Панама визаларини қоидаларга зид равишда берганликда ҳам гумон қилинмоқда. Бундай ноқонуний савдо Мартинелли ва унинг тахмин этилаётган шерикларига 100 миллион долларгача даромад келтиргани айтилмоқда.

Собиқ президент мазкур айбловлар билан 21 йил муддатгача қамоқ жазосига тортилиши мумкин.