Путин ўз қизлари қаерда ишлашини муҳокама қилишдан бош тортди

Россия президенти Владимир Путин ўз қизларининг иш фаолияти ҳақида гапиришдан бош тортди, дея хабар бермоқда Meduza.

Унинг сўзларига кўра, улар Россияда яшайди ва ишда илк қадамларини қўймоқда. Улар айнан қаерда меҳнат қилишига Путин аниқлик киритмади.

«РБК» мухбирининг «‘Иннопрактика’ жамғармаси раҳбари Катерина Тихонова сизнинг қизингизми?» — маъносидаги дангал саволига президент жавоб бермади. У ўз қизлари ҳақида хавфсизлик каби нуқтаи назарлардан гапириб ўтирмаслигини таъкидлади.

«Улар бизнес ва сиёсат билан шуғулланмайди. Улар ҳеч қаерга бурнини суқмайди», — деди Путин.

Владимир Путиннинг икки қизи бор — Мария (1985 йилда туғилган) ва Катерина (1986). Президентнинг қизлари ҳақидаги маълумотлар жуда кам.

2015 йил январида Reuters агентлигининг манбалари анонимлик шарти остида, Москва давлат университети билан ишлайдиган «Миллий интеллектуал тараққиёт» жамғармаси раҳбари Катерина Тихонова Россия президенти Владимир Путиннинг қизи эканлигини тасдиқлаган эди.

Путиннинг иккинчи қизи — Мария Фассен, Reuters маълумотларига кўра, Москвадаги Эндокринология илмий марказида ишлайди.

Эслатиб ўтамиз, аввалроқ халқаро савдо марказида Россия президенти Владимир Путиннинг анъанавий катта матбуот анжумани бошлангани хабар берилган эди. Унда Путин Қодиров билан Немцовнинг ўлдириб кетилишини муҳокама қилмагани ва қилмоқчи ҳам эмаслигини айтди.