Украина президенти Пётр Порошенко Россия томонидан мамлакатлар ўртасидаги эркин савдо ҳудуди тўғрисидаги шартноманинг тўхтатиб қўйилиши натижасида Украина иқтисодиёти анча зарар кўриши, бироқ Киев озодлик ва мустақиллик учун бунга тайёрлигини маълум қилди, деб ёзади «Европейская правда».
Бу ҳақда у 16 декабрь, чоршанба куни Брюсселда «Украина—Евроиттифоқ» мини-саммити бошланишидан олдин журналистларга маълум қилди.
У Россия Украина—Евроиттифоқ эркин савдо ҳудуди кучга киришидан анча олдин Украина маҳсулотларига нисбатан савдо-сотиқда чекловлар кирита бошлаганини эслатди, бироқ Киев ўз режаларидан воз кечмаслигини таъкидлади.
«Бизнинг позициямиз аниқ ва Украина—ЕИ сўнгги саммитида тасдиқланган: 1 январдан Украина ва Евроиттифоқ ўртасидаги эркин савдо ҳудуди кучга киради», — дея қайд этди у.
Нашр эслатишича, 16 декабрь куни Россия президенти Владимир Путин 2016 йил 1 январдан Украинага нисбатан эркин савдо ҳудуди тўғрисидаги шартнома амал қилишини тўхтатиш ҳақида фармон имзолаган эди.
Изоҳ (0)