Жаҳоннинг энг кекса аёли Ўзбекистонда истиқомат қилаётгани эълон қилинди

Хоразм вилояти Янгибозор тумани Қаландардўрмон қишлоғи «Манғит» маҳалласида истиқомат қилаётган Моможон Романова «Даракчи» газетаси томонидан нафақат Ўзбекистоннинг, балки жаҳоннинг энг кекса аёли деб эълон қилинди. Газета маълумотларига кўра, онахон 119 ёшда.

«1896 йилда туғилганман», — дейди Моможон Романова. Онахоннинг 11 нафар фарзанди, 50 нафардан зиёд невараси, 70 дан ортиқ чевараси бор.

«Дуога қўл очиб, суҳбатга якун ясаган Моможон аяни кўп саволга тутгим келмади. Чарчатиб қўйишдан чўчидим, аммо унинг нигоҳларида бардамлик, ҳаётга муҳаббат учқунлари чақнаб турарди», — деб ёзади суҳбат муаллифи Наргиза Бўронова.

Куни кеча Европанинг энг кекса аёли, италиялик Эмма Морано 116 ёшга тўлгани ҳақида хабар берилган эди (у 1899 йил 29 ноябрда туғилган). АҚШда истиқомат қилаётган, 3 декабрь ҳолатига кўра 116 ёш 150 кунлик бўлган Сюзанна Мушатт-Жонс эса расман жаҳондаги нафақат энг кекса аёл, балки энг кекса инсон ҳисобланади (у 1899 йил 6 июль куни туғилган).

Қайд этиш жоиз, бундан аввал ҳам жаҳоннинг энг кекса инсони Ўзбекистонда истиқомат қилаётгани айтилган эди (бироқ халқаро миқёсда расман тан олинмаган) — 1880 йили туғилгани таъкидланган Тўти Юсупова 2015 йил баҳорида, 135 ёшида вафот этганди.