«Жаҳон» ахборот агентлигининг фотомухбири Анвар Илёсов анъанавий тарзда ўтказиб келинадиган «Энергия побед» спорт журналистикаси фестиваль-танловида «Энг яхши фоторепортажлар» номинациясида бош совринни қўлга киритди. Бу ҳақда Ўзбекистон Миллий олимпия қўмитасининг матбуот хизмати хабар бермоқда.
Тажрибали фотомухбир кўп йиллардан буён Ўзбекистон спорт делегацияси таркибида Олимпиада ва Осиё ўйинларида, шунингдек, турли даражадаги халқаро мусобақаларда бевосита иштирок этиб, воқеа жойидан фоторепортажлар тайёрлаб келади.
Ўзбек спортчиларининг зафарли онларидан тайёрланган фоторепортажлар «Энергия побед» фестиваль-танловида ҳакамлар томонидан энг юқори баҳога лойиқ топилди ва Илёсов «Энг яхши фоторепортажлар» номинациясида ғолибликка эришди.
Эслатиб ўтамиз, дастлаб ўтказилган саралаш босқичидан Анвар Илясов билан бирга яна икки нафар ижодкор, булар – Франциянинг Agence France-Presse агентлигидан Кирилл Кудрявцев ҳамда Австриянинг «Biathlonworld.com» портали ходими Евгений Тумашов муваффақиятли ўтиб, ғолибликка даъвогарлар рўйхатидан ўрин эгаллаган эди.
Ҳал қилувчи босқичда ҳам ҳакамлар Анвар Илясовнинг фоторепортажларини энг яхши деб топди ва у ўз номинациясида биринчи ўринни эгаллади. Ушбу номинацияда иккинчи ўринга Евгений Тумашев сазовор бўлган бўлса, Кирилл Кудрявцевга учинчи ўрин насиб этди.
Барча (жами 11 та номинация) ғолиб ва совриндорларга мукофотлар тантанали равишда топширилди.
Маълумот учун. Бу йилги фестиваль-танловга РФнинг 62 ҳудуди ҳамда 10 давлатдан жами 302 та ижодий ишлар юборилган.
Изоҳ (0)