Чеченистон раҳбари ва «Терек» клуби фахрий президенти Рамзан Қодиров Instagram’даги саҳифасида футбол бўйича Россия чемпионатининг «Терек» ва «Зенит» жамоалари ўртасидаги ўйинида микрофондан бир неча сония фойдаланганини маълум қилди. Бу ҳақда «ТАСС» хабар бермоқда.
«Ўйин давомида микрофондан бир неча сония давомида фойдаландим. ‘Балли, ҳакам!’ дедим ва ‘Матч ТВ’ каналига миннатдорчилик билдирдим. Яна ким гапирганини билмайман, — дея таъкидлаган Қодиров. — Грознийдаги ўйинларда майдонга машъала, футболчиларга эса бутилка отилмайди. Питер жамоасининг бош мураббийи йирик мағлубият сабабларига изоҳ бериш ўрнига микрофон, ҳакамнинг журъатсизлиги ва ҳоказолар ҳақида гапирди. ‘Ёмон созандага сози халақит беради’, деб бежиз айтишмаган», — дея таъкидлаган Қодиров.
Эслатиб ўтамиз, 28 ноябрь, шанба куни Грознийда бўлиб ўтган баҳс 4:1 ҳисобида «Терек» фойдасига ҳал бўлди. «Зенит» бош мураббийи Андре Виллаш-Боаш «Матч ТВ» каналига берган интервьюсида Рамзан Қодировни назарда тутиб, «кимдир тўхтамасдан микрофон орқали бақирди, ҳакамнинг эса буни тўхтатишга журъати етмади», — дея шикоят қилганди.
Изоҳ (0)