Мексика Федерал полицияси ва прокуратура ходимлари Чиапас штатидаги Тапачула туманида жойлашган қаҳва плантацияларида 50 дан зиёд ёш болани меҳнат қуллигидан қутқарди, дея хабар бермоқда «Корреспондент.net».
Вояга етмаганларнинг барчаси ва уларнинг ота-оналари — жами 18 та оила Гватемала фуқаролигига эга. Ушбу 18 та оилада умумий ҳисобда 54 нафар вояга етмаган бола бўлган.
Гватемаланинг Чиапасдаги бош консули сўзларига кўра, улар ҳафтада олти кун ўн соатдан ишлаб, қаҳва доналарини терган. Уларга қаҳванинг ҳар бир килограмми учун бор-йўғи 1,5 песо (0,09 доллар) беришган ва уларни ночор боқишган.
Ҳукумат вакиллари плантациялар хўжайинларини болаларни эксплуатация қилгани учун жаримага тортди. Шундан сўнг оилаларнинг барчаси Гватемалага қайтиб кетди.
Изоҳ (0)