Филиппин жанубида тўрт киши, жумладан, чет элликларни ўғирлаб кетган «Абу Саяф» террорчи гуруҳи ҳар бир тутқун учун 21 миллион доллар талаб этмоқда. Бу ҳақда «РИА Новости» хабар берди.
Сентябрь ойи ўрталарида қуролланган жангарилар мамлакат жанубидаги Самал оролида жойлашган меҳмонхонада икки нафар канадалик, бир нафар норвегиялик ва бир нафар Филиппин фуқароси бўлган аёлни ўғирлаб кетган.
Шундан сўнг тутқунлар Филиппин ва Канада ҳукуматидан жангарилар талабини бажариш, Холо оролидаги ҳарбий амалиётни тўхтатишни сўраган видеолавҳа тармоқда пайдо бўлди. Уларни айнан шу оролдаги чангалзорда тутиб турилгани тахмин қилинмоқда.
Полиция вакили Уилбен Мейорнинг таъкидлашича, Филиппин ҳукумати террорчилар билан музокара олиб бормаган ва уларга маблағ тўлаш ниятида ҳам эмас.
Август охирида Филиппин жанубида чет эллик тутқунларни қутқариш учун кенг кўламли ҳарбий амалиётлар бошланган. Расмийлар «Абу Саяф» Холо оролида ўнга яқин хорижликларни (улар орасида Малайзия, Нидерландия, Япония ва Италия фуқаролари бор) тутқунликда ушлаб турган, деб ҳисобламоқда. Мамлакат разведкаси мазкур гуруҳ аъзолари сонини 400 киши атрофида баҳолаган.
Изоҳ (0)