Сноуден яширинча тингланишдан ҳимояланган севимли мессенжерини ошкор қилди

АҚШ Миллий хавфсизлик агентлиги собиқ ходими Эдвард Сноуден Twitter’даги обуначиларига қандай ҳимояланган мессенжердан фойдаланишини ошкор қилди.

«Мен ҳар куни Signal’дан фойдаланаман. #ФҚБгамаълумотучун (Спойлер: улар буни аллақачон билади)», — деб ёзди у.

Open Whisper Systems ишлаб чиқувчиси маълумотлар махфийлигини таъминловчи TextSecure ва RedPhone дастурларига эга. Компания яқин кунларда уларни янги — Signal дастурига бирлаштиришини маълум қилди. Android учун ягона версия чиқариб бўлинган.

Эдвард Сноуден билан боғлиқ можаро 2013 йил июнида келиб чиққан эди. Ўшанда у АҚШ махсус хизматлари интернет ва мобил алоқа орқали бутун дунёдаги фойдаланувчиларни кузатиб боргани ҳақидаги махфий ахборотларни фош этган эди.