Чорвачиликка ихтисослашган хўжаликлар учун роторли-дискли дон майдалагич қурилмаси ясалди

Тошкент давлат аграр университети «Қишлоқ хўжалигини механизациялаш» факультети олимлари томонидан чорвачиликка ихтисослашган фермер, деҳқон ва шахсий хўжаликлари учун кичик ҳажмдаги «Роторли-дискли дон майдалагич» қурилмасини ишлаб чиқди. Бу ҳақда университет қошидаги «Инновация ва интеграция Маркази» ходимлари «Дарё»га хабар берди.

Қурилма асосчилари дон майдалагични яратишда ўз олдиларига қуйидаги вазифаларни ижобий ҳал этишга асосий эътиборларини қаратди ва ўз мақсадларига эришди:

• энергетик кўрсаткичларини пасайтириш;
• сифат кўрсаткичларини яхшилаш;
• иқтисодий самарага эришиш.

Тошкент давлар аграр университети олимлари таклиф этаётган роторли-дискли дон майдалагич, кичик фермер, деҳқон ва шахсий хўжаликлар учун мўлжалланган бўлиб, металл ва энергия сиғими кам, бир ва уч фазали электр тармоқларида ишлатилиши мумкин, нисбий энергия сарфи жаҳон стандартларига жавоб беради ва 0,005 кВт*соат/кг дан ошмайди. Сифат кўрсаткичлари бўйича майдалагичда майдаланган дон заррачалари ўлчамларининг бир хиллигини таъминлаши билан белгиланади. Майдалагич IAF № 20040161 рақамли патенти билан ҳимояланган. Майдалагичнинг ротор ва статор оралиғидаги тирқишини ўзгартириш орқали моллар ва паррандаларнинг тури, гуруҳига қараб керакли майдаликда майдаланган ёрма олиш имконини беради.

Жорий йилнинг 19—21 май кунлари «Ўзекспомарказ»да бўлиб ўтган «Инновацион ғоялар, технологиялар ва лойиҳалар VIII Республика ярмаркаси»да ушбу қурилманинг саноат нусхаси намойиш этилди ва ярмаркага келган кўплаб фермер хўжаликлари раҳбарларининг қизиқишига сабаб бўлди. Ярмарка доирасида ушбу қурилмага буюртмалар олиниб, 30 миллион сўмлик шартномалар имзоланди.