Тошкентда 2 ноябрь, душанба куни «Китоб олами» номли катта китоб дўкони иш бошлади. «Anons.uz»нинг қайд этишича, бу Ўрта Осиёдаги энг йирик китоб дўконидир.
Дўкон нисбатан катта бўлиб, унда бир неча — мумтоз адабиёт, чет эл адабиёти, шеърият бурчаги, қомуслар қатори, болалар адабиёти каби ихтисослашган бўлимлар бор. Бундан ташқари, илмий-оммабоп ва амалий адабиёт бўлимида саёҳатномалар, ошпазлик китоблари, тарбия, саломатлик, боғдорчилик ҳақида адабиёт ва қўлланмаларни топиш мумкин.
Ҳозирча дўконда 5 мингдан ортиқ номдаги китобларни топиш мумкин. Аксарият китоблар «Ўзбекистон», Янги аср авлоди, Ғафур Ғулом номидаги ва Hello Nashr каби ноширлик уйлари томонидан чоп этилган. Чет эл нашриётларидан Москвадаги «Эксмо» ва «Олма»нинг китоблари ҳам бор. «Китобларнинг нархлари 10—200 минг сўм атрофида», — дейилади нашр хабарида.
Болалар адабиёти бўлими ўзига хос жиҳозлангани ва безаклангани, адабиётларнинг хилма-хиллиги билан харидор эътиборини ўзига қаратади. Китоб токчаларида халқ эртакларини ҳам, ака-ука Гримм ва Пушкиннинг эртакларини топиш мумкин. «Харидлардан сўнг дўконнинг ўзида жойлашган мўъжаз қаҳвахонада мутолаага берилиш ҳам мумкин», — деб ёзади интернет-нашр.
Маълумот учун, «Китоб олами» дўкони Тошкент шаҳридаги Мустақиллик кўчасида, Консерваториянинг эски биноси қаршисида жойлашган.
Изоҳ (0)