Украина ИИВ собиқ президент Виктор Януковичнинг ўғли Александр Януковичга қарашли Украина тараққиёт банкидаги ҳисоб рақамларда бўлган 113 миллион долларни хатлади. Бу ҳақда ички ишлар вазири Арсен Аваков Facebook’даги саҳифаси орқали хабар берди, дея маълум қилди «Коммерсант.ru».
«Терговчилар томонидан судга қадар текширув доирасида банкда тинтув ўтказилган ва жисмоний ҳамда юридик шахсларнинг 2,6 миллиард гривнадан зиёд (113 миллион доллар) маблағи мавжуд депозит ҳисоб рақамлари хатланган. Улардан 12 миллион гривна (521 минг доллар) шахсан А.Януковичга тегишли», — дейилади хабарда.
Эслатиб ўтамиз, Украинанинг собиқ президенти инсон ҳуқуқлари бўйича Европа судига Украинага қарши даъво киритган. Януковичга нисбатан кўплаб асоссиз жиноий ишлар қўзғатилиши, уларни судда адолатли ва мустақил кўриб чиқилишига бўлган ҳуқуқининг бузилиши, амалдаги ҳокимият томонидан мухолиф сифатида сиёсий таъқиб этилиши даъво қўзғашга асос бўлган.
Изоҳ (0)