Россияда 1 ноябрдан эътиборан Украина фуқаролари учун уларнинг Россияга кириши билан боғлиқ имтиёзли тартиб бекор қилинди. Бу ҳақда «Газета.ru» хабар бермоқда.
Имтиёзли шартлар Украина жануби-шарқидан келган қочоқлар учун сақланиб қолади. Қолган украиналиклар ишлаш учун патент, вақтинча яшаш учун рухсатнома ва бошқа шу каби рухсат берувчи ҳужжатларсиз Россия ҳудудида 180 кун давомида жами 90 кундан ортиқ бўлиши мумкин эмас.
«Россия ҳудудида меҳнат фаолиятини олиб бораётган ва ўзининг қонуний яшашини узайтиришни истаган Украина фуқаролари патент олишни сўраб Россия Федерал миграция хизмати (ФМХ)га мурожаат қилишлари керак», — деди Россия ФМХ раҳбари Константин Ромодановский.
Унинг қўшимча қилишича, 1 ноябрдан сўнг Украина фуқароларида Россия ҳудудидаги ҳуқуқий ёки меҳнат мақомини расмийлаштириш учун 30 кун муддат бўлади. «1 декабрдан бошлаб қоидабузарларга нисбатан маъмурий, хусусан, киришни тақиқлаш чоралари кўрилиши бошланади», — дея қўшимча қилди ФМХ раҳбари.
Изоҳ (0)