Дунёнинг 100 дан зиёд мамлакатида бўлишга улгурган канадалик эр-хотин Жастин ва Анна Уильямс Шимолий Кореяга саёҳатни «ҳаётларидаги энг унутилмас саргузашт» деб атади. Бу ҳақда Business Insider’га таяниб, «Корреспондент.net» ҳикоя қилди.
Жастин ва Анна корейслар бошқа мамлакатлар ҳақида нечоғли кам билишларидан ҳайратга тушган. «Бу ўзга дунёга саёҳат бўлди», — дея таъкидлайди Жастин.
Кореяга саёҳат Пекиндаги брифингдан бошланган. Мазкур тадбирда сайёҳларга КХДРда нима мумкин, нима эса қатъиян тақиқлангани хусусида маълумот берилган. Масалан, агар Ким Чен Ир портретлари ва ҳайкаллари кадрга тўлиқ сиғмаса, суратга тушириш ман этилган.
Мамлакатга учиб келганларидан сўнг Жастин ва Аннанинг паспортларини то улар Кореяни тарк этгунча олиб қўйишганини жуфтлик «сафарнинг энг ёқимсиз қисми», деб атаган.
Уларни Пхеньян оролидаги Yanggakdo меҳмонхонасининг 25-қаватига жойлаштиришган. Эрталаблари то расмийлар томонидан бириктирилган гид келмагунча бинони тарк этишлари мумкин бўлмаган.
Уильямслар КХДРга сафар қилган ҳар бир сайёҳ эътиборини тортадиган жиҳат – кўлами кишини ажаблантирувчи ёдгорликлар ҳаддан зиёд кўплигини таъкидлайди. Улар ҳам корейс доҳийлари — Ким Ир Сен ва Ким Чен Ир ҳайкали пойига гул қўйган, балоғатга етган ҳар бир фуқаро тақиши шарт бўлган Ким Чен Ир тасвирланган значок таққан.
Жастинда халқ таълим саройига ташриф катта таассурот қолдирган. Сарой кутубхонасида 30 миллионга яқин китоб йиғилган, уларнинг аксарияти «буюк етакчи ва севимли доҳий»га бағишланган.
Изоҳ (0)