Миср ҳукумати Россиянинг Metrojet («Когалимавиа») авиакомпаниясига тегишли Airbus A321 лайнери ҳалокати натижасида самолёт бортидаги барча йўловчи ва экипаж аъзолари ҳалок бўлганини расман маълум қилди. Бу ҳақда, Sky News’га асосланиб, Meduza хабар бермоқда.
Metrojet авиакомпанияси лайнери 31 октябрь, шанба куни Тошкент вақти билан 8:51 да Мисрнинг Шарм-аш-Шайх шаҳридан Санкт-Петербург томон ҳавога кўтарилиб, 23 дақиқадан сўнг радарлардан йўқолган. Самолёт бўлаклари Мисрнинг Синай яримороли шимолидан топилди.
Лайнер бортида, дастлабки маълумотларга кўра, 224 киши бўлган. Миср Транспорт вазирлиги томонидан тақдим этилган маълумотларга кўра, самолётда 63 нафар эркак, 138 нафар аёл ва 2—17 ёш оралиғидаги 17 нафар бола бўлган ва уларнинг барчаси Россия фуқаролари эди.
Аввалроқ самолёт бўлаклари остидан омон қолганларнинг овозлари эшитилаётгани ҳақида хабар берилган эди. Кейинроқ, ҳодиса жойида 100 кишининг жасади топилгани ҳақида ахборот берилди. Миср ҳукумати тахминига кўра, авиаҳалокатга самолётдаги техник носозликлар сабаб бўлган.
Изоҳ (0)