Японияда 11 ёшли қизни қасддан ўлдиришда айбланиб, умрбод қамоқ жазосига ҳукм этилган икки маҳбус салкам 20 йилдан сўнг озодликка чиқди. Осака олий суди мазкур ҳукмни хато деб топди ва маҳбусларни зудлик билан қўйиб юбориш бўйича қарор чиқарди. Бу ҳақда «ТАСС» хабар бермоқда.
1995 йили Осакадаги уйлардан бирида ёнғин чиқади ва унда ушбу хонадон соҳибаси, ҳозирда 51 ёшга тўлган Кэйко Аокининг қизи тириклайин ёниб кетади. Полиция, кейинчалик прокуратура аёл ва у билан яшовчи Тацухиро Бокунинг суғурта пули олиш мақсадида уйга атайин ўт қўйишда айблайди. Кэйко Аоки айбловларни рад этади, аммо унинг руҳан синган жазмани «айби»га иқрор бўлади ва уларга суд томонидан умрбод қамоқ жазоси берилади.
Адвокатлар, Аокининг ўзи, кейинчалик эса унинг собиқ жазмани ҳам ишни қайтадан кўриб чиқишни талаб этди. Узоқ йиллардан сўнг қайтадан бошланган янги тергов ёнғин гаражда бензин сизиши ва қисқа туташув оқибатида рўй берганини аниқлади.
Осака судининг мазкур қарори мамлакатда катта шов-шувларга сабаб бўлди, бу ҳақда барча телеканаллар ҳикоя қилмоқда. Олдинроқ Японияда шунга ўхшаш овозали воқеа Ивао Ҳакамадага чиқарилган ҳукмнинг бекор қилиниши бўлганди: 78 ёшли собиқ боксчи қотилликда айбланиб, умрининг 34 йилини ўлимга ҳукм этилганлар камерасида ўтказган.
Изоҳ (0)