Yaponiyada 11 yoshli qizni qasddan o‘ldirishda ayblanib, umrbod qamoq jazosiga hukm etilgan ikki mahbus salkam 20 yildan so‘ng ozodlikka chiqdi. Osaka oliy sudi mazkur hukmni xato deb topdi va mahbuslarni zudlik bilan qo‘yib yuborish bo‘yicha qaror chiqardi. Bu haqda “TASS” xabar bermoqda.
1995-yili Osakadagi uylardan birida yong‘in chiqadi va unda ushbu xonadon sohibasi, hozirda 51 yoshga to‘lgan Keyko Aokining qizi tiriklayin yonib ketadi. Politsiya, keyinchalik prokuratura ayol va u bilan yashovchi Tatsuxiro Bokuning sug‘urta puli olish maqsadida uyga atayin o‘t qo‘yishda ayblaydi. Keyko Aoki ayblovlarni rad etadi, ammo uning ruhan singan jazmani “aybi”ga iqror bo‘ladi va ularga sud tomonidan umrbod qamoq jazosi beriladi.
Advokatlar, Aokining o‘zi, keyinchalik esa uning sobiq jazmani ham ishni qaytadan ko‘rib chiqishni talab etdi. Uzoq yillardan so‘ng qaytadan boshlangan yangi tergov yong‘in garajda benzin sizishi va qisqa tutashuv oqibatida ro‘y berganini aniqladi.
Osaka sudining mazkur qarori mamlakatda katta shov-shuvlarga sabab bo‘ldi, bu haqda barcha telekanallar hikoya qilmoqda. Oldinroq Yaponiyada shunga o‘xshash ovozali voqea Ivao Hakamadaga chiqarilgan hukmning bekor qilinishi bo‘lgandi: 78 yoshli sobiq bokschi qotillikda ayblanib, umrining 34 yilini o‘limga hukm etilganlar kamerasida o‘tkazgan.
Izoh (0)