Евроиттифоққа яқин мамлакатларда 20 миллиондан зиёд эҳтимолий муҳожир мавжуд. Бу ҳақда қўшничилик сиёсати ва кенгайиш бўйича еврокомиссар Йоханнес Хан ЕИнинг миграция масалаларига бағишланган навбатдан ташқари саммитига ташрифи чоғида маълум қилган, дея хабар беради «ТАСС».
«Суриядаги жанговар ҳаракатлар фаоллашиши билан муҳожирлар оқими янада ортади. Алеппо атрофидаги жангларнинг ўзи қўшимча 3 миллион нафаргача муҳожирлар пайдо бўлишига олиб келиши мумкин. Қиш яқинлашаётгани ва совуқ об-ҳаво вазиятни баттар кескинлашувига олиб келади», — дея таъкидлаган еврокомиссар.
Ханнинг фикрига кўра, ЕИнинг бугунги кундаги асосий вазифаси чегарадош давлатлар, биринчи галда Италия ва Грецияда муҳожирларни рўйхатдан ўтказиш ва ўша жойнинг ўзида улардан қай бири Европада бошпана олишга даъвогарлик қилиши мумкинлиги юзасидан қарор чиқариш учун фильтрлаш марказларини ташкил этишдан иборат. Шунингдек, ЕИ чегараларни қўриқлаш чоралари ва қочоқларнинг яшаш шароитларини яхшилаш учун чегарадош давлатларга молиявий ёрдамни кучайтириши лозим.
Навбатдан ташқари самит муҳожирлик оқимининг Туркия, Греция ва Болқон давлатлари орқали ўтадиган «Болқон йўналиши»га бағишланган.
Изоҳ (0)