Украиналик чарм қўлқоп устаси, супер оғир вазн тоифасининг мутлақ жаҳон чемпиони Олександр Усикнинг навбатдаги жанги ҳақида муҳим янгиликлар пайдо бўлди. The Ring Magazine нашрининг хабар беришича, Саудия Арабистонининг йирик компаниялари — Riyadh Season ва Села — Усик ҳамда янги зеландиялик боксчи Жозеф Паркер ўртасидаги жангни ташкил этиш борасида қизиқиш билдирмаганини маълум қилган.
Аввалроқ Жаҳон бокс ташкилоти (WBO) мазкур жангни расмийлаштирган ва икки боксчига 30 кун ичида шартнома бўйича келишувга эришиш учун рухсат берган эди. Аммо Саудия томонининг бефарқлиги бу жангнинг ўтказилиши борасида шубҳаларни кучайтирмоқда.
Олександр Усик айни дамда супер оғир вазн тоифасидаги барча асосий чемпионлик камарларини бирлаштирган — у мутлақ жаҳон чемпиони ҳисобланади. Унинг потенциал рақиби Жозеф Паркер эса WBOънинг вақтинчалик чемпиони мақомига эга. Агар жанг ташкил этилса, бу оғир вазн тоифасидаги навбатдаги унификация жанги бўлиши мумкин эди. Бироқ ҳомийларнинг орқага чекиниши мазкур жангнинг тақдирини ноаниқлик остида қолдирмоқда.
Маълумот учун, 2025 йил 19 июль куни Олександр Усик Лондоннинг “Уэмбли” стадионида британиялик рақиби Даниэль Дюбуага қарши рингга чиқди. Ушбу жангда Усик бешинчи раундда рақибини нокаутга учратиб, ўз чемпионлик камарларини яна бир бор муваффақиятли ҳимоя қилди.
Олександр Усик профессионал фаолияти давомида 24 та жанг ўтказиб, уларнинг барчасида ғалаба қозонган ва ҳозиргача мағлубият нималигини билмаяпти. Жозеф Паркер эса 39 та жангда қатнашиб, 36 марта ғалаба (шундан 24 таси нокаут билан) ва 3 марта мағлубият қайд этган.
Изоҳ (0)