Самолётда ёнидаги одамни тишлаб олган португалияликнинг танасида шубҳали контейнерлар топилди

Ваҳима хуружи вақтида ёнида ўтирган кишини тишлаб олиб, сўнг вафот этган «Лиссабон – Дублин» авиарейси йўловчисининг танасидан ичида номаълум моддалар бўлган контейнерлар чиқариб олинди. Бу ҳақда «РИА Новости» хабар бермоқда.

Ирландиянинг RTE телерадиокорпорацияси хабарига кўра, ҳодиса 19 октябрь, душанба куни мамлакатнинг энг йирик — Aer Lingus авиакомпанияси рейси вақтида юз берган.

Экипаж командири Корк халқаро аэропортига фавқулодда қўниш учун рухсат сўраган. Ваҳимага тушиб, бортда жанжал кўтарган 24 ёшли португалиялик кўп ўтмай ҳушини йўқотган. Самолёт қўнганидан сўнг етиб келган шифокорлар йўловчининг вафот этганини қайд этган.

RTE маълумотларига кўра, экспертлар танани ёриб кўриш вақтида унинг ичидан бир неча контейнер топган, уларнинг камида биттаси очиб кўрилган. Ҳозирги вақтда контейнерлар суд экспертизасига юборилган.

Суд экспертизаси ва токсикологик тест натижалари олинмасидан, португалиялик йўловчи ўлимининг аниқ сабабларини айтиб бўлмайди.

Қонунбузарлар одатда гиёҳванд моддаларни ноқонуний олиб ўтишда шундай йўлдан фойдаланади. Хусусан, 2015 йилнинг июнь ойида 1,5 килограмм кокаинни ўзининг кўкрак имплантларида олиб ўтишга уринган гондураслик аёл Богота аэропортида қўлга олинган эди.