Россиялик миллиардер Михаил Прохоров Россиядаги жорий вазиятни 90-йиллардаги ҳолатга қиёслади. Бу ҳақда у Livejournal сервисидаги блогида ёзди, дея хабар бермоқда «Газета.ru».
Миллиардернинг сўзларига кўра, ҳукуматнинг дастлаб уч йиллик бюджетдан воз кечиб, сўнг 1—6 ойга мўлжалланган стратегик қарорлар қабул қилиш йўлига ўтишни бошлагани унга айниқса 1990-йилларни эслатмоқда.
«Иқтисодий ҳокимият тепасида ўтирганларнинг режалаштириш йўналишидаги ғоялари қанчалик тез ўзгараётгани мени алоҳида ҳайрон қолдирмоқда: аввалига уч йиллик бюджетдан воз кечилди, энди эса бир ойдан олти ойгача мўлжалланган ‘стратегик’ қарорлар қабул қилинмоқда, кейин нима бўлади... Кўрамиз. Одамлар маошдан маошгача яшаган 90-йилларда ҳам худди шундай бўлганди. Иқтисодий ҳукуматимиз эгалари олдида иқтисодиётни 90-йиллардаги, балки ундан ҳам олдинроқ — ҳар ерда бир хил нархлар, соҳада битта давлат компанияси, ҳамма учун битта бренд бўлган даврлардаги ҳажмга тушириб қўйиш вазифаси турганлигига ишонгинг келмайди», — деб ёзади Прохоров.
Айни вақтда, Прохоровнинг қайд этишича, иқтисодиётни кузатиб бораётган кишига Россияда иқтисодий фаолликни сиқиш жараёни кетаётгани очиқ кўриниб қолган, бу жараёнда санкциялар ўзига хос ролни ижро этди.
Аввалроқ бошқа бир россиялик миллиардер — Олег Дерипаска ҳукумат ҳаракатларини танқид остига олиб, Россия иқтисодиёти учун энг ёмон кунлар ҳали олдинда эканлиги ҳақида фикр билдирган эди.
Изоҳ (0)