Амир Темур мақбарасига тегишли ҳақиқий кошин 100 йилдан ортиқ вақт мобайнида Россиянинг Свердлов вилоятидаги ўлкашунослик музейи омборида қаровсиз ҳолда ётди. «ТАСС» хабарига кўра, XV асрга оид мармар экспонатни 2015 йилда музей ходимлари тасодифан топиб олди.
«1887 йилги Урал-Сибирь кўргазмаси каталогида биз Амир Темур мақбарасига мансуб экспонат ҳақидаги ёзувни топдик. Ўшанда бу кошинни Туркистондаги мустамлакачилик юришлари иштирокчиси Александр Баранов намойиш этган. Катта эҳтимол билан, экспонатни унинг ўзи Самарқанддан олиб келган. Биз ҳақиқий фрагментни қидиришни бошлаб, ярим миллионга яқин бошқа артефактлар орасидан тезгина топдик», — деди музей илмий ходими.
Амир Темур мақбарасидан олинган кошиннинг узунлиги бир метрдан ортиқ, кенглиги эса тахминан 15 сантиметр. Мармар кошиннинг бир қисмида аслига тўғри сурат сақланиб қолган.
Маълумот учун, Темурийлар салтанати ва сулоласига асос солган соҳибқирон Амир Темур 1405 йили вафот этган ва Самарқанддаги оилавий хилхона — Гўри-Амир мақбарасига дафн этилган. Кейинчалик бу ерга унинг ўғиллари ва неваралари ҳам кўмилган.
Изоҳ (0)