Германиялик овчи Зимбабве жануби-шарқидаги Гонарежу миллий боғида яшаган филни отиб ўлдирди. The Daily Telegraph’нинг қайд этишича, бу каби йирик фил охирги марта бундан 30 йил аввал ўлдирилганди.
Боғ ходимларининг сўзларига кўра, 8 октябрь куни исми ошкор этилмаётган германиялик 60 ёшли филни отиб ўлдирган. Ов қилиш учун рухсатнома олиш ва жониворни қонуний йўл билан ўлдириш имкониятига эга бўлиш учун у 60 минг долларга яқин пул тўлаган.
Жониворларни ҳимоя қилиш бўйича давлат ташкилоти — Zimbabwe Conservation Task Force’дан маълум қилишларича, фил тишларининг оғирлиги 55 килограммни ташкил этган. Ҳажмининг катталиги сабаб уларни ерда судрашга тўғри келган.
21 кун давом этган ов вақтида Германия фуқаросига маҳаллий овчи ёрдам берган. «Ов якуни ҳақида ‘яшиллар’ нима дейишини биламан, бироқ бу қонуний бўлди, биз қонундан ташқарига чиққанимиз йўқ», — деди зимбабвелик овчи.
Зимбабве профессионал овчилар ва гидлар уюшмаси раиси Луи Мюллернинг The Daily Telegraph’га маълум қилишича, овчи филнинг тишлари жуда катта эканлигини уни отиб қўйганидан сўнг фаҳмлаган.
Мюллернинг сўзларига кўра, боғ ходимлари шу кунгача бу филни кўрмаган эди. Акс ҳолда, ўзига хос камёб турни ов қилиш бошидан тақиқланган бўларди.
Нашрнинг қайд этишича, жонсиз филнинг суратлари интернетда тарқалиб кетган ва овчиларнинг олқишли, табиат ҳимоячиларининг эса танқидли фикрларига сабаб бўлган.
Изоҳ (0)