АҚШ Федераль қидирув бюроси, Махфий хизмат ва қимматли қоғозлар бўйича комиссия Dow Jones компанияси серверлари бузилиши юзасидан суриштирув бошлади. Meduza’нинг хабар беришича, АҚШ ҳуқуқни муҳофаза қилиш органлари серверларга уюштирилган ҳужумлар ортида россиялик хакерлар турибди, деб ҳисобламоқда.
Bloomberg агентлигининг қайд этишича, текширув ишлари бир йилдан бери олиб борилмоқда. Хакерлар ҳали амалга оширилмаган савдолар ҳақидаги инсайдерлар маълумотларини қўлга киритиш мақсадида серверларга ҳужум қилган. Ҳуқуқбузарлар мазкур ахборотдан ғаразли мақсадларда фойдаланганми-йўқми, ҳозирча аниқ эмас.
Октябрь ойининг бошида Dow Jones компания тизимларига бузиб кирилгани ва 3,5 мингга яқин мижознинг маълумотлари ўғирланганини маълум қилганди. ФҚБнинг жорий тергови айнан шу иш билан боғлиқми-йўқми, номаълум.
Dow Jones Руперт Мердокнинг News Corp. корпорациясига тегишли. Компания машҳур The Wall Street Journal газетасини чоп этади, шунингдек, ўз обуначиларига молиявий янгиликларни етказиб беради.
Изоҳ (0)