Венгрия муҳожирлар оқимини тўхтатиш мақсадида Хорватия билан чегарани ёпди. Бу ҳақда, Венгрия ҳукумати баёнотига асосланиб, «Европейская правда» хабар бермоқда.
«16 октябрь, жума куни ярим тунда Венгрия—Хорватия чегараси ёпилди ва бу ерда аввалроқ Венгрия—Сербия чегарасида қўлланилиши бошланган назорат усуллари жорий этилди», — дейилади ҳукумат ахборотида.
Чегара ёпилганидан сўнг қочоқлар иккита чегара транзит зонасида бошпана тақдим этишни сўраб, илтимоснома тақдим этиши мумкин.
Венгрия ҳукумати вакилларининг қайд этишича, мамлакатга Венгрия—Хорватия чегараси орқали қонуний йўл билан кириш имконияти сақлаб қолинган.
Венгрия бош вазири Виктор Орбан Европа Иттифоқидан Греция—Туркия чегарасини ёпишни талаб қилган, акс ҳолда Венгрия Хорватия билан чегарасини ёпишини маълум қилганди.
Аввалроқ Венгрия Сербия билан чегарага девор ўрнатишни бошлаганди, мамлакатнинг бу ҳаракати халқаро ҳамкорлар томонидан танқид остига олинганди.
Мазкур чора оқибатида Сербиядан Венгрияга келаётган муҳожирлар оқими сезиларли камайди, бироқ, айни вақтда, Хорватиядан келаётган муҳожирлар сони кўпайиб кетди.
Изоҳ (0)