Бугун,

  • USD 11014.01
  • RUB 191.8
  • EUR 10674.78

«Кексаларни эъзозлаш йили» давлат дастури асосида Ўзбекистон Республикаси Ахборот технологиялари ва коммуникацияларини ривожлантириш вазирлиги томонидан ёши улуғ инсонларга хизмат кўрсатишга ихтисослаштирилган «Nuroniy.uz» интернет-портали ишга туширилди. Бу ҳақда вазирлик матбуот хизмати хабар бермоқда. Ушбу портал Ўзбекистондаги кекса авлод вакиллари турмуш тарзининг турли жабҳаларига оид саволларига жавоб топиши мумкин бўлган муҳим ахборот манбаидир.

Фото: Ахборот технологиялари ва коммуникацияларини ривожлантириш вазирлиги

Фото: Ахборот технологиялари ва коммуникацияларини ривожлантириш вазирлиги

«Электрон ҳукумат» ахборот тизими таркибида фаолият кўрсатувчи портал кекса ёшли интернет фойдаланувчиларини ҳукумат томонидан кексаларга яратиб берилаётган имкониятлар, имтиёз ва қулайликларга оид маълумотлар, янгилик ва хабарлардан бохабар қилади, кекса инсонларга зарур интерактив хизматлардан фойдаланиш, ахборот технологиялари бўйича билимларини мустаҳкамлаб бориш имкониятини беради.

Айни кунларда порталга кекса инсонлар учун зарур ва фойдали ҳисобланган, турли имтиёз ва қулайликлар, пенсия ва ижтимоий қулайликларга оид янгиликларни, фойдали маслаҳат ва тавсиялар берувчи материалларни жойлаштириш ва уларни тизимли янгилаб бориш, ўзаро фикр-мулоҳаза алмашишга ёрдам берувчи ижтимоий тармоқни ишга тушириш юзасидан ишлар олиб борилмоқда.

Шунингдек, Меҳнат ва аҳолини ижтимоий муҳофаза қилиш вазирилиги ва унинг ҳудудий бошқармалари, «Саховат» ҳамда «Мурувват» интернат-уйлари, кексаларга мўлжалланган санатория ва соғломлаштириш марказлари, ахборот-ресурс марказларини мазкур порталга улаш орқали ягона, ижтимоий хизматлардан фойдаланишга қулай платформани яратиш мақсад қилинган. Айни кунда портал фаолияти такомиллаштирилмоқда.

Мазкур лойиҳа Uzinfocom компьютер ва ахборот технологияларини жорий қилиш ва ривожлантириш, «Электрон ҳукумат» тизимининг ривожлантириш марказлари, шунингдек «Ўзбектелеком» АК кўмагида, Меҳнат ва аҳолини ижтимоий муҳофаза қилиш вазирилиги, Халқ таълими вазирлиги, «Нуроний», «Маҳалла», «Пенсия» жамғармалари билан ҳамкорликда амалга оширилади.

Изоҳ
Асосий янгиликлар