Германиянинг Мюр-ам-Зее шаҳрида ўзбекистонлик икки талаба Ўзбекистонга меҳр қўйган оила учун тандир қуриб берди. Бу ҳақда «Дарё»га Авазбек Мамасаидов маълум қилди.
«Хива гилами, қизил гулли адрасдан тикилган тўшак-болиш билан безатилган сўри. Хонтахтага дастурхон ёзилган, пахта гулли чойнакка аччиққина кўк чой дамланган. Бундай манзарани оддий бир ўзбек хонадонида учратиш мумкин. Айни дамда Германиянинг Мюр-ам-Зее шаҳрида истиқомат қилувчи Ортслар хонадонида ҳам юқорида айтилган ўзбек миллий буюмларидан бор. Бутун бошли сўридан тортиб ўчоқ-қозон-у кабоб қўрагача топилади. Бир неча кун аввал эса улар ҳақиқий ўзбекча тандирга ҳам эга бўлди», — деб ёзади Авазбек.
Ортслар оиласи иш юзасидан Ўзбекистонда уч йилдан зиёд вақт яшаган ва ватанига ажойиб таассуротлар билан қайтган.
«Ўзбекистонда ўтказган йилларимиз ҳаётимизнинг энг қизиқарли онлари бўлди, — дейди жаноб Ганс-Оултер Ортс. — Илк кунларданоқ ўзбекларнинг самимийлиги, очиқ муомаласи ва меҳмондўстлигини ҳис этдим».
«Сафаримиз аввалида ўзбек тилини бошланғич даражада ўрганган эдик ва бу мен учун жуда фойдали бўлди, — дейди Ортс хоним. — Уй-рўзғор буюмларини бозорларда савдолашиб сотиб олиш, маҳаллий аҳоли билан мулоқот қилиш менга жуда ёқар эди. Ўзбекистонда ўзимни худди ўз уйимдагидек ҳис этар эдим».
Авазбек ёзишича, Германияга қайтар экан, Ортслар оиласи эсдалик сифатида ўзлари билан кўплаб ўзбек миллий буюмларини олиб кетишга ҳаракат қилди. Натижада хонадонга ташриф буюрган меҳмон уйнинг ҳар жойидан Ўзбекистон тафти уриб турганини ҳис этиши мумкин.
Изоҳ (0)