Тошкентдаги «Ўзбекистон» спорт саройида дзюдо кураши бўйича Гран-При туркумига кирувчи йирик халқаро турнир якунланди. Мазкур нуфузли мусобақада дунёнинг 52 давлатидан 355 нафар спортчи жами 14 та вазн тоифасида совринли ўринлар учун кураш олиб борди, деб хабар беради «Оламспорт».
Якунда Ўзбекистон терма жамоаси дзюдочилари 1 та олтин, 1 та кумуш, 4 та бронза медали билан умумжамоа ҳисобида учинчи ўринни эгаллади. Ўзбекистонга ягона олтин медални -73 кг вазн тоифасида татамига чиққан Мирали Шарипов келтирди. Ушбу вазн тоифасида иштирок этган Ўзбекистоннинг яна бир вакили Ғиёсжон Бобоев эса бронза медалига сазовор бўлди. Мусобақанинг сўнгги учинчи кунги баҳсларида -90 кг вазн тоифасида Шерали Жўраев бронза медали билан тақдирланди. -100 кг вазн тоифасида татамига чиққан Сойибжон Қурбонов ҳам бронза медалига сазовор бўлди.
Тошкент Гран-Присида 4 та олтин медални қўлга киритган дзюдо ватани ҳисобланган Япония терма жамоаси умумжамоа ҳисобида биринчи бўлди. Учта олтин, битта кумуш медални ўз ҳисобига ёзиб қўйган Жанубий Корея терма жамоаси иккинчи ўринни эгаллади. Германия, Мўғулистон, Буюк Британия, Италия, БАА ва Туркманистон терма жамоалари уйга биттадан олтин медаль билан қайтди.
Эслатиб ўтамиз, Тошкент Гран-Присининг мукофот жамғармаси 100 000 АҚШ долларини ташкил қилди. Ушбу Гран-При мусобақасида 2016 йили Рио-де-Жанейро шаҳрида ўтказиладиган XXXI ёзги Олимпия ўйинларининг йўлланмалари учун рейтинг очколар ҳам ўйналди. Мусобақада олтин медалга сазовор бўлган спортчилар 300 рейтинг очкосига, иккинчи ўрин соҳиблари 180, бронза медали совриндорлари эса 120 рейтинг очкосига эга бўлди.
Изоҳ (0)