Серхио Агуэро 20 дақиқа ичида 5 та гол киритиб, жамоасини биринчи ўринга олиб чиқди

Англия Премер-лигаси 8-туридан ўрин олган «Манчестер Сити»—«Ньюкасл» учрашуви «шаҳарликлар»нинг 6:1 ҳисобидаги йирик ғалабаси билан якунланди. Серхио Агуэро «Сити»нинг 6 та тўпидан 5 тасини 20 дақиқа давомида — 42, 49, 50, 60 ва 62-дақиқаларда киритиб, пента-трикка эришди. Бу ҳақда «Stadion.uz» хабар бермоқда.

Аргентиналик футболчи бир учрашувда 5 та гол киритишга муваффақ бўлган APЛ тарихидаги бешинчи ўйинчи бўлди. Унгача пента-трикка Жермейн Дефо (36 дақиқа ичида), Алан Ширер (54), Энди Коул (65) ва Димитар Бербатов (68) эриша олган.

Бундан ташқари, "Манчестер Сити" рақиб дарвозасига 20 дақиқада 6 та тўп киритиб, бу борадаги AПЛ рекордини янгилади. Жамоа ушбу ғалабаси эвазига 18 очко тўплаган ҳолда мусобақа жадвалида яна биринчи ўринга кўтарилиб олди.

Эслатиб ўтамиз, 22 сентябрь куни Германия Бундеслигасида «Бавария» ҳужумчиси Роберт Левандовски «Вольфсбург» билан учрашувда иккинчи бўлимда захирадан майдонга тушиб, 9 дақиқа давомида пента-трик амалга оширишга муваффақ бўлган эди.