Саудия Арабистонининг FlyNas авиакомпанияси кутилмаганда рейсларни қолдириши оқибатида қозоғистонлик бир неча юз нафар Ҳаж зиёратчилари Жидда аэропортида очликда қолмоқда. Бу ҳақда «Gazeta.kz» хабар бермоқда.
Қайд этишларича, Ҳаж амалларини бажариб бўлган қозоғистонликлар рейснинг амалга оширилишини Жидда аэропорти полларида ётган ҳолда бир неча ўн соатдан бери кутмоқда.
Ҳозирча мазкур ҳолат учун ҳеч ким, хусусан, зиёратчиларнинг сафарини уюштирган сайёҳлик агентликлари ҳам жавобгарликни ўз бўйнига олмоқчи эмас. Агентликларнинг вакиллари сўзларига кўра, одамларнинг бундай аҳволда қолишига биринчи галда Қозоғистон ҳукумати айбдор.
Маълум бўлишича, Қозоғистон қонунчилигига мувофиқ, чартер рейслари билан хизмат кўрсатувчи авиакомпания захира самолётини тайёрлаб қўйиши керак, бироқ FlyNas’да захира борти йўқ, мамлакат маъмурлари эса, қонун бузилишига кўз юмган ҳолда, FlyNas’нинг Қозоғистон авиабозорига киришига рухсат берган.
Изоҳ (0)