Германия қуролли кучларининг Бюхел авиабазасига жойлаштирилаётган АҚШ компонентлари эскирган қурол-аслаҳа ўрнига олиб келинаётган бўлиб, у ерга янги ҳеч нарса жойлаштирилаётгани йўқ. Бу ҳақда, «РБК» хабарига кўра, Германиянинг Россиядаги элчиси Рюдигер фон Фрич маълум қилди.
«Бу ерда ҳеч қандай янги нарса йўқ, яъни у ерда бор нарсалар янада кенгайтирилаётгани йўқ. Бунда гап фақат эскирган, хизмат муддати якунига етган қисмларни алмаштириш ҳақида бормоқда, холос», — деди фон Фрич.
Элчининг мазкур баёноти Германия ҳудудига АҚШнинг янги атом бомбалари жойлаштирилаётгани ҳақида пайдо бўлган хабарларга немис расмийлари томонидан билдирилган дастлабки муносабат бўлди. Аввалроқ АҚШ томони Европа ядровий бомбаларнинг жойлаштирилаётгани ҳақидаги ахборотни «ноаниқ» деб атаган эди.
АҚШ Энергетика вазирлиги ҳузуридаги Ядровий хавфсизлик бўйича миллий бошқарма матбуот хизмати бошлиғи ўринбосари Шелли Лавернинг маълум қилишича, B61-12 атом бомбаларини ишлаб чиқариш ишлари 2020 йилдан аввал бошланмайди, 2015 йилда уларни Германия етказиб бериш режалаштирилмаяпти. Унинг сўзларига кўра, ҳозирги вақтда фақат бомба ташувчи самолётлар модернизация қилиняпти, холос.
Изоҳ (0)