Россияни сиёсий қамал қилишга уринишдан ҳеч қандай маъно йўқ, деди НАТО бош котиби Йенс Столтенберг Dagbladet газетасига берган интервьюсида. Бу ҳақда «Корреспондент.net» хабар бермоқда.
Столтенберг Ғарб ва Россиянинг БМТ доирасидаги муносабатлари ҳақида фикр билдираркан, совуқ урушдан сўнг НАТО ва Россия ўртасида ўрнатилган стратегик ҳамкорлик эндиликда йўқ эканлигини ёдга солиб ўтди.
«Қримнинг аннексияси ва Украина шарқида русларнинг пайдо бўлиши билан стратегик ҳамкорлик йўққа чиқди. Лекин биз Россия билан совуқ уруш ҳолатида эмасмиз», — деди НАТО бош котиби.
«Россия БМТ Хавфсизлик кенгашининг доимий аъзосидир. БМТ Хавфсизлик кенгашининг доимий аъзоси сифатида Россия ташкилотда муҳим ўринга эга, шу сабабли уни сиёсий қамал қилишга уриниш ҳеч қандай маънога эга эмас», — дея қўшимча қилди Столтенберг.
Эслатиб ўтамиз, сентябрь ойи ўрталарида Оқ уй матбуот котиби Жош Эрнест, агар Россия Сурия президенти Башар Асадни қўллаб-қувватлашда давом этадиган бўлса, халқаро сиёсий қамалда қолиши мумкинлигидан огоҳлантирган эди.
Изоҳ (0)