Туркиянинг Самсун шаҳрида Гран-При туркумига кирувчи йилнинг йирик мусобақаларидан бири якунланди. Мазкур нуфузли мусобақада 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг йўлланмалари учун рейтинг очколар ҳам ўйналди, деб хабар беради Ўзбекистон Миллий олимпия қўмитаси матбуот хизмати.
Дунёнинг етакчи таэквондо усталари иштирокида бўлиб ўтган мусобақада ўзбекистонлик Дмитрий Шокин (+87 кг) бронза медалига сазовор бўлиб, рейтинг жадвалидаги мавқеини янада яхшилаб олди.
Юқори вазндаги спортчилар орасида дунё рейтингида биринчи ўринни эгаллаб турган яна бир ўзбекистонлик таэквондочи Жасур Бойқўзиев иккинчи давра баҳсида кореялик Чи Жол Хога 3:4 ҳисобида имкониятни бой берди. Гарчи турнирда совринли ўринлардан бирига эга бўлмаган бўлсада, Жасур Бойқўзиев дунё рейтингида ҳамон пешқадамлик қилмоқда. Дмитрий Шокин иккинчи ўринда бораётган бўлса, учинчи ўринда озарбайжонлик Р.Исаев бормоқда. Озарбайжонлик спортчи ҳам ушбу турнирда биринчи учрашувдаёқ мағлубиятга учради.
Самсун Гран-Присида иштирок этган Ўзбекистон терма жамоасининг яна икки аъзоси ака-ука Максим ва Никита Рафаловичлар совриндорлар сафидан жой олмади.
Изоҳ (0)