Темур Олимхўжаев бошчилигидаги Ўзбекистон ўсмирлар терма жамоаси Осиё чемпионати—2016 саралаш босқичи доирасидаги учинчи ўйинда ҳам йирик ҳисобда ғалаба қозонди. Бу ҳақда Ўзбекистон футбол федерацияси матбуот хизмати хабар бермоқда.
Фаластиннинг ар-Рам шаҳрида жойлашган «Файсал ал-Ҳусайн» стадионида Яман ўсмирлар терма жамоасига қарши бўлиб ўтган учрашувда бу сафар Ўзбекистон U-16 терма жамоаси рақиб дарвозасига бешта гол киритди.
Ҳар икки жамоа ҳам ўтказилган аввалги икки ўйинда ғалаба қозонган ва 6 тадан очкога эга бўлиб турганди. Ҳар иккисида ҳам гуруҳдан биринчи ўрин билан, Осиё чемпионатига йўл олиш имконияти бор эди. Шу сабабли ўйиннинг дастлабки чораги эҳтиёткорлик билан ўтди.
Биринчи бўлим 3:1 ҳисобида Ўзбекистоннинг ғалабаси билан якунланди. Учрашувнинг иккинчи бўлимида Расул Йўлдошев яна икки бор рақиб дарвозасини аниқ нишонга олди. Бу унинг ушбу саралаш босқичидаги иккинчи хет-триги бўлди. Биринчи ўйинда олган жароҳати туфайли Фаластин билан ўйинда майдонга туша олмаган Йўлдошев икки ўйинда 6 та гол киритишга муваффақ бўлди.
Учрашувга қўшиб берилган дақиқалар ўтиб бораётган бир пайтда Яман ҳисобдаги фарқни бироз қисқартирди – 5:2.
Ўзбекистон ўсмирлар терма жамоаси Осиё чемпионати саралашидаги барча ўйинларда йирик ҳисобда рақибларини мағлуб этди. Дастлабки ўйинда Мальдив ороллари жамоаси дарвозасига жавобсиз 8 та гол киритган бўлса, иккинчи ўйинда Фаластинни 6:0 ҳисобида мағлуб этган эди.
Ўзбекистон U-16 «А» гуруҳи ғолиби сифатида 2016 йилнинг 15 сентябридан 2 октябригача Ҳиндистонда ўтказиладиган Осиё чемпионати финал босқичига йўлланмани қўлга киритди.
Изоҳ (0)