Чеченистон раҳбари Рамзан Қодиров ўзининг Украинанинг санкциялари рўйхатига киритилгани билан боғлиқ хабарларга муносабат билдирди. «ТАСС» хабарига кўра, 16 сентябрь куни эълон қилинган мазкур рўйхатдан, Қодировдан ташқари, Россия ва бошқа мамлакатларнинг 388 нафар юқори мартабали амалдорлар ва журналистлари ўрин олган.
«Айтишларича, у ерда Пётр Порошенко санкциялар тўғрисида қандайдир фармон чиқарибди. Тўғрисини айтсам, шу жаноб Порошенкога ачинаман. Унинг бир олам муаммоси бор, лекин у менга нисбатан қандайдир санкция эълон қиляпти. Эмишки, Украинанинг энг асосий душмани — Россия. Порошенко келади ва кетади, халқ эса қолади. Киевдаги ҳокимият эгалари қанчалар ҳаракат қилмасин, Украинани Америкага олиб кета олмайди, Американи Украинага олиб кела олмайди», — деб ёзади Қодиров ижтимоий тармоқлардаги саҳифаларида.
«Ўзимга-ўзим савол беряпман: Украина банкларидаги ҳисоб-рақамларимсиз ва Украинага бормай қандай яшайман энди?! Агар жиддийлашадиган бўлсак, бундан-да аҳмоқона ҳужжат бўлиши мумкин эмас. Ҳеч бўлмаса Украина фуқароларини кулдирманг — сизнинг бу каби фармонларингиз совуннинг кўпигидек ҳеч қандай аҳамиятга эга эмаслигини улар жуда яхши билади. Киевда менинг ҳеч қандай ҳисоб-рақамим йўқ, у ерга боргим келиб қолса, ҳеч ким ҳеч қачон мени тўхтата олмайди», — дея қўшимча қилди Қодиров.
Қўшимча сифатида, Чеченистон раҳбари Украина халқига тинчлик ва фаровонлик тилади.
Изоҳ (0)